O BA PARDONALI...

O bà pardὸnali

In u silenziu di a to morti
Sentu sorghja a to inchiitùdina

“Aghju libaratu a Corsica è a Francia in darru”

A bughjura m’aguanta

Vaghjimu dui milla è unu
Scelsi di parta
Affucatu da un’ aria pridaghja
Di i camisgi neri sempri prisenti
Dipoi a to partenza
I cantoni malvi
Sὸ attaccati
U numicu
Baracina d’un tempu chjusu

    A noscia Corsica hè rosa di feli

    Si dici chì a cuntaghjoni hè pianettaria

U sangu di rincori miscia à fiumu
I muraddi trimulighjani
Cadini
Aprini a strada à a scimizia

    Ma palesi i to dubbiti

    « Avariu duvutu stà à senta à mammata, ùn vultà mai in Corsica »

    O bà, ti pregu
Pardὸnali
Sὸ paciaghji di u pinsà
À l’umbra di a vita

Pardὸnali
Hè Corsa a to fiddola

.

DANIELE  MAOUDJ

.