« More cum’è nasce u ghjornu
À l’usciu di a vita vera ;
Incide a petra à filari
Di gioia a di guai amari ;
In mè ùn spusterà la sera
Fin ch’è t’ùn mi faci ritornu…
Vogliu scrive lu to ritornu
À mezu à un sprichjà di ghjornu,
Scialbà u lume à cor di sera.
Puru si a fola ùn hè vera
Annigà li penseri amari
In l’acque di li mio filari…
Trà mè è tè quanti filari !
Mà l’inguernu face ritornu
Palisendu ricordi amari…
È ne piove nantu à u ghjornu
Di a nostra prumessa vera…
Eccuti l’arcu di a sera !
Navicella appesa à la sera
Chì schjarisci li mio filari
Cunfina pè a strada vera
E sperenze d’ogni ritornu !
In lu cristallu di u ghjornu
Svanischinu li sogni amari !
Sò di più chè lu fele amari
Sò li silenzii in la mio sera ;
Balsamu di u primu ghjornu,
Allusingu di issi filari
Chì mi conta lu to ritornu
À l’alba di a mossa vera...
Cunsumà passione vera
Senza ma più curdogli amari…
Imbellita fammi ritornu !
O s'amoglinu pè la sera
I detti di tanti filari
Ch’annivuleghjanu lu ghjornu…
TORNADA
U ghjornu sarà in la so vera
Di lu to ritornu è la sera
Cùn ella trascinerà tutti li filari amari… »
.
PATRIZIA GATTACECA
.
